جيىندى قۇتتىقتاۋ سوزىمەن اشقان قازاقستاننىڭ تۇركياداعى ەلشىسى ابزال ساپاربەك ۇلى «قازاقستان پرەزيدەنتىنىڭ «استانا – ەڭ الدىمەن ازاتتىعىمىزدىڭ سيمۆولى, قازاقستاننىڭ جاڭا تاريحىنىڭ شىنايى شەجىرەسى, قارقىندى دامۋىمىزدىڭ, قول جەتكەن تابىستارىمىزدىڭ, ابىروي-بەدەلىمىزدىڭ, بەرەكە-بىرلىگىمىزدىڭ جارقىن كورىنىسى» دەگەن ۇلاعاتتى ءسوزى ءاردايىم جادىمىزدان شىققان ەمەس. تاۋەلسىزدىكتىڭ تەڭدەسسىز تارتۋى, ازاتتىقتىڭ التىن ارقاۋى – جالپاق جۇرتىمىزدى ايقىن بولاشاققا, كەمەل كەلەشەككە جۇمىلدىرىپ, دامۋ جولىنداعى ۇلتتىق ماقسات-مۇددەلەرىمىزدى ءبىر ارناعا توعىستىردى. وسى تۇستا وتانىمىزدىڭ جۇرەگى, تاۋەلسىزدىگىمىزدىڭ تىرەگى – استانانىڭ ايتۋلى مەرەكەسىنە وراي قازاقستان رەسپۋبليكاسىنىڭ تۇركياداعى ەلشىلىگى انادولۋ توپىراعىندا بىرقاتار ماڭىزدى شارالاردى جۇزەگە اسىرىپ, ەل تاريحىنداعى ەلەۋلى وقيعاعا وزىندىك ۇلەس قوسىپ وتىرعانىن اتاپ وتكىم كەلەدى.
ءبىزدىڭ مەملەكەتىمىز ءۇشىن زور قۋانىشىمىزدى العاشقىلاردىڭ ءبىرى بولىپ بولىسكەن تۇركيانىڭ ورنى بولەك. قازاقستان پرەزيدەنتى نۇرسۇلتان نازارباەۆ ء«بىز تاۋەلسىزدىكتى جاريالادىق, ەكى ساعاتتان كەيىن مارقۇم تۇرعىت ءوزال ماعان تەلەفون شالىپ, «تۇركيا قولدايدى» دەدى. بۇل قۋانىشتى ەش ۋاقىتتا ەستەن شىعارۋعا بولمايدى» دەگەن بولاتىن. كوپ ۇزاماي باۋىرلاس ەكى ەل اراسىندا تىعىز قارىم-قاتىناس ورناپ, استانانىڭ ىرگەتاسى قالانۋىنا تۇرىك ينۆەستورلارى مەن كاسىپكەرلەرى جانە قۇرىلىس كومپانيالارى بەلسەنە ارالاستى. استانانىڭ تۇركى الەمىنە ورتاق ساۋلەتتىك ديزاينى, كوگالداندىرۋى مەن اباتتاندىرىلۋى جانە ينفراقۇرىلىمىندا دا تۇرىك باۋىرلارىمىزدىڭ قولتاڭباسى بار» دەپ اتاپ ءوتتى.
جيىنعا ارنايى قاتىسقان تۇركيا رەسپۋبليكاسى پرەزيدەنتىنىڭ باس كەڭەسشىسى يالچىن توپچۋدىڭ ءوز سوزىندە «بولاشاقتا قازىرگى الەم تاريحى جازىلار ۋاقىتتا قازاقستان مەن قازاق تۇركىلەرى بولىمىندە «تۇڭعىش پرەزيدەنت», «تۇركى دۇنيەسىنىڭ اقساقالى نۇرسۇلتان نازارباەۆ», «استانا قالاسى» دەگەن سوزدەر ءبىر ۇعىمعا اينالىپ, قاتار اتالاتىن بولادى. استانا – «اسيتانەي شاحانە», ياعني «پاتشانىڭ تابالدىرىعى, تاڭعاجايىپ باس قالا» دەگەندى بىلدىرەدى. بۇل انىقتاما كەزىندە ىستانبۇل ءۇشىن قولدانىلعان ەدى. مەملەكەتتەر مەن ەلدەردىڭ قالىپتاسۋ تاريحىندا ۇلى كوشباسشىلار قانداي رولگە يە بولسا, باستى شەشىمدەر شىعارىلعان شاھارلار دا ماڭىزدى ورىن العان. استانا ءاپ-ساتتە ەگەمەن ەلدىڭ التىن تاجىنە اينالىپ ۇلگەردى»,- دەدى.
تۇركيا ۇلى ۇلتتىق ءماجىلىسىنىڭ ەكس-سپيكەرى حيكمەت چەتين, تۇركيانىڭ بۇرىنعى مادەنيەت ءمينيسترى نامىك كەمال زەيبەك, تۇركيانىڭ بۇرىنعى دەنساۋلىق ساقتاۋ ءمينيسترى حاليل شىۆگىن, قوجا احمەت ياساۋي ۋنيۆەرسيتەتى وكىلەتتى كەڭەسىنىڭ توراعاسى مۇسا يىلدىز جانە تۇرىك زيالى قاۋىم, شەتەلدىك ديپلوماتتار, ىسكەر قاۋىم وكىلدەرى قاتىسقان كونفەرەنتسيا بارىسىندا ەلشىلىكتىڭ تارتۋى رەتىندە قازاق جانە تۇرىك تىلدەرىندە جارىق كورگەن « ۇلى دالا استاناسى» كىتابىنىڭ تانىستىرىلىمى ءوتتى. جيناقتا تۇركيانىڭ ساياسي تۇلعالارى مەن زيالى قاۋىم وكىلدەرىنىڭ استانا مەن باس قالانىڭ اۆتورى – ەلباسى نۇرسۇلتان نازارباەۆ تۋرالى 30 تارتا ساراپتامالىق ماقالالارى, زەرتتەۋ ەڭبەكتەرى مەن جىلى لەبىزدەرى جارىق كورگەن. جاڭا تۋىندى تۇركيا رەسپۋبليكاسىنىڭ ەكس-پرەزيدەنتى ابدۋللا گۇلدىڭ «عالامات جەتىستىكتىڭ جەمىسى» اتتى ماقالاسىمەن باستالىپتى.
كونفەرەنتسيادا استانانىڭ قالىپتاسۋى جانە دامۋى تۋرالى انكاسام زەرتتەۋ ورتالىعىنىڭ ديرەكتورى مەحمەت سەيفەتتين ەرول, تيكا توراعا ورىنباسارى مەحمەت سۇررەيا ەر, ەۋرازيا جازۋشىلار قاۋىمداستىعىنىڭ توراعاسى ياكۋب وماروعلى جانە YDA كومپانيالار توبىنىڭ باسقارما مۇشەسى جۇنەيت ارسلان ارنايى بايانداما جاسادى. باسقوسۋ سوڭىندا استانا كۇنىنە ارنالعان مەرەكەلىك قابىلداۋ شاراسى ءوتتى.
ەلۆيرا سەرىكقىزى,
«ەگەمەن قازاقستان»
